1Th 1 | BOJ | STEP | Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi Abu Qotei wo Tamo Koba Yesus Kristus wo naŋgi aiyel taqnjrejunub. Qotei a niŋgi qa are boleiyimqa niŋgi lawo na soqniye.

1 Thessalonians 1

1 Iga Pol na Sailas na Timoti na iga qalub anjam endi neŋgreŋyosim niŋgi tamo uŋgasari Tesalonaika qureq dia Yesus aqa ñam qa koroosib loueqnub qaji niŋgi qa qariŋyonum. Niŋgi Abu Qotei wo Tamo Koba Yesus Kristus wo naŋgi aiyel taqnjrejunub.

Qotei a niŋgi qa are boleiyimqa niŋgi lawo na soqniye.

Tesalonaika naŋgi Yesus qa naŋgo areqalo siŋgilateb deqa Pol a naŋgi qa tulaŋ areboleboleiyej

2 Iga gaigai niŋgi qa are qaloqnsim deqa Qotei biŋiyeqnum. Osim nuŋgo ñam gaigai maroqnsim pailyeqnum. 3 Niŋgi Kristus qa nuŋgo areqalo siŋgilateqnub deqa niŋgi kumbra bole bole yeqnub. Agi niŋgi na tamo kalil naŋgi tulaŋ qalaqalainjroqnsib naŋgi qa wau bole yeqnub. Mondoŋ gago Tamo Koba Yesus Kristus a olo bqas anjam di niŋgi nuŋgo are miligiq di siŋgilatoqnsib a qa tariŋeqnub. Iga nuŋgo kumbra deqa are qaloqnsim deqa iga nuŋgo ñam maroqnsim gago Abu Qotei biŋiyeqnum. 4 O was qu, Qotei a niŋgi tulaŋ qalaqalaiŋgeqnu. A na niŋgi aqa segi qa marsiq giltŋgej. Di iga qalieonum.

5 Iga nami Kristus aqa anjam bole nuŋgoq osi bem. Iga laŋa anjam maro na osi bosai. Iga Qotei aqa siŋgila na ti aqa Mondor Bole aqa kumbra na ti osi bem. Bati deqa iga gago areqalo Kristus qa siŋgilatonamqa niŋgi di uneb. Iga nuŋgo ambleq di sosimqa niŋgi aqaryaiŋgoqnem. Gago kumbra di niŋgi segi qalie.

6 Niŋgi Qotei aqa anjam eb deqa gulube gargekoba nuŋgoq di branteleŋej. Ariya bati deqa niŋgi gago kumbra ti Tamo Koba Yesus aqa kumbra ti dauryqa uratosai. Niŋgi dauryoqneb. Qotei aqa Mondor na nuŋgo areqalo tigeltetŋgej deqa niŋgi tulaŋ areboleboleiŋgoqnej. 7 Nuŋgo kumbra di tamo uŋgasari kalil Masedonia sawa ti Akaia sawa ti dia sosib Kristus qa naŋgo areqalo siŋgilateqnub qaji naŋgi unoqnsib deqa niŋgi daurŋgeqnub. 8 Agi niŋgi Tamo Koba Kristus aqa anjam marsib laqnab anjam di gilsiq Masedonia sawa ti Akaia sawa ti dia brantej. Sawa dia segi sai. Sawa sawa kalilq dia dego niŋgi Qotei qa nuŋgo areqalo siŋgilateqnub anjam di tamo uŋgasari naŋgi quekriteb. Deqa uŋgum, iga olo aitentosim naŋgi minjrqasai. 9 Iga nami nuŋgo ambleq di sonamqa bati deqa niŋgi gago anjam dauryoqneb. Nuŋgo kumbra di tamo uŋgasari sawa sawa kalilq di unub qaji naŋgi qalieosib deqa mare mare laqnub. Niŋgi are bulyosib gisaŋ qotei naŋgi torei uratnjrsib olo Qotei bole agi ŋambile gaigai unu qaji a areiyosib aqa anjam dauryeqnub. Osib deqa niŋgi Qotei aqa wau tamo bole unub. Nuŋgo kumbra deqa ti naŋgi mare mare laqnub. 10 Mondoŋ Qotei aqa Ŋiri a laŋ qureq dena olo bqas deqa bini niŋgi a qa tariŋoqnsib unub. A moinaqa Qotei na olo subq na tigeltej. Di Yesus a segi qujai. A na iga eleŋej deqa mondoŋ Qotei aqa minjiŋ oqwa bati boqnimqa iga aqa minjiŋ di turqasai. Iga so bole gaigai sqom.